Detaje të reja të rënda kanë dalë nga krimi tronditës i ndodhur më 2 maj në Shkodër, ku turisti amerikan Brandon Saporito, rreth të 50-ve, masakroi me mjet prerës bashkëjetuesen e tij, Sandra Holley Saporito, 53 vjeçe, në një banesë të marrë me qira në rrugën “At Shtjefën Gjeçovi”.
Pamjet e publikuara nga Panorama.al tregojnë autorin, të zhveshur dhe të larë në gjak, duke dalë nga banesa dhe duke u shoqëruar nga policia drejt ambulancës. Ai kishte plagë në duar të shkaktuara nga mjeti i krimit, ndërsa ndodhet jashtë rrezikut për jetën.
Policia dyshon se autori ishte në gjendje të dehur në momentin e ngjarjes. Në vendngjarje nuk është gjetur asnjë person tjetër, ndërsa viktima është gjetur pa shenja jete brenda apartamentit.
Grupi hetimor, nën drejtimin e Prokurorisë, po vijon punën për zbardhjen e plotë të motivit, ndërsa ngjarja ka lënë të tronditur komunitetin vendas dhe është në fokusin e mediave.
Ky është një nga krimet më të rënda të ndodhura vitet e fundit në qytetin e Shkodrës, ku një marrëdhënie e dukshme turistike përfundoi në një akt barbar dhune që po hetohet si vrasje me dashje në rrethana rënduese.