Policia e Cërrikut ka zbardhur vjedhjen e ndodhur në ambientet e zyrës së Partisë Demokratike në këtë qytet, pas një denoncimi zyrtar nga vetë përfaqësuesit lokalë të PD-së. Ngjarja ndodhi në një ambient të marrë me qira për qëllime elektorale, nga ku ishin vjedhur disa pajisje elektronike, përfshirë një kompjuter dhe një televizor.
Pas hetimeve intensive, autoritetet arrestuan Arben Metanin, 36 vjeç, si autorin e dyshuar të vjedhjes. Sipas policisë, Metani kishte hyrë në ambientet e zyrës gjatë natës dhe kishte marrë pajisjet, të cilat më pas ia kishte shitur një personi tjetër.
Në pranga ka rënë edhe Klevis Zane, 46 vjeç, që bleu kompjuterin e vjedhur, duke u akuzuar për veprën penale “Përvetësimi i parave ose mallrave që rrjedhin nga vepra penale”.
Policia njoftoi se pajisjet janë sekuestruar dhe i janë kthyer subjektit politik për ruajtje, ndërsa materialet procedurale janë referuar Prokurorisë së Elbasanit për veprime të mëtejshme.
Ngjarja shton tensionin në klimën parazgjedhore, sidomos në një qytet ku garat politike janë historikisht të forta dhe incidentet elektorale të ndjeshme.