Procesi i votimit ka nisur në të gjithë vendin këtë mëngjes të 11 majit 2025, por në një nga qendrat e votimit në Fier është shënuar një problem serioz: mungesa e kolaudimit të pajisjes së identifikimit elektronik ka bllokuar nisjen e votimit.
Sipas raportimeve nga terreni, qytetarët kanë mbërritur në qendrën e votimit, por janë detyruar të presin pasi pajisja që identifikon votuesit ende nuk është vënë në funksion. Anëtarët e komisionit ndodhen në vendet përkatëse, por procesi nuk ka nisur.
Komisioni Qendror i Zgjedhjeve (KQZ) është njoftuar për problematikën dhe pritet të marrë masa për zgjidhjen e menjëhershme të situatës.
Zgjedhje me sfida teknike dhe tension politik
Sot mbi 3.7 milionë qytetarë shqiptarë pritet të zgjedhin 140 deputetë të rinj në Kuvend, ndërsa për herë të parë, të regjistruar për të votuar janë edhe 245.935 emigrantë nga diaspora. Pjesëmarrja pritet të jetë e lartë, por sfida teknike si në Fier rrezikojnë të cënojnë mbarëvajtjen e procesit.
Zgjedhjet e 11 Majit 2025 po zhvillohen mes akuzave të forta për blerje votash, përdorim të institucioneve shtetërore dhe tensione në disa qarqe. Aktualitet.al po ndjek në kohë reale çdo zhvillim për të sjellë të vërtetën përpara qytetarëve.