Sarandë – Arrestim në kuadër të një dosjeje të rëndë penale për shitje droge ndaj të miturve.
Më 18 maj 2025, pranë Prokurorisë së Shkallës së Parë të Juridiksionit të Përgjithshëm Sarandë, është regjistruar një procedim penal ndaj O.L., i dyshuar për “Prodhim dhe shitje të narkotikëve”, pasi dyshohet se i ka shitur kokainë një vajze të mitur.
Bazuar në veprimet e para hetimore, rezulton se O.L. ka pasur kontakte me të miturën dhe ka kryer shkëmbimin e lëndës narkotike të llojit kokainë, duke u futur kështu në një dosje të rrezikshme me implikime të drejtpërdrejta në dëmtimin e të miturve.
Më 19 maj 2025, Prokurori i çështjes i është drejtuar Gjykatës me kërkesë për caktimin e masës së sigurimit personal “arrest në burg”, duke vlerësuar rrezikshmërinë dhe seriozitetin e veprës penale. Gjykata e pranoi kërkesën, dhe në të njëjtën ditë, Prokuroria lëshoi urdhrin për ekzekutimin e vendimit.
Masa është ekzekutuar më 26 maj 2025, rreth orës 00:30, nga efektivët e Komisariatit të Policisë Nr. 2 Tiranë, ku O.L. u kap në qytetin e Tiranës, duke përfunduar kështu në pranga.
Në vijim të hetimeve, më 27 maj, Prokuroria iu drejtua sërish Gjykatës për verifikimin e kushteve dhe vijimin e masës së arrestit me burg. Me vendimin e datës 28 maj 2025, Gjykata konfirmoi masën e sigurisë “arrest në burg” për O.L.
Rasti ka ngritur alarmin për rritjen e përfshirjes së të rinjve në trafikimin e drogës dhe kontaktet e rrezikshme të të miturve me rrjete shpërndarjeje. Autoritetet premtojnë hetim të thelluar dhe ndëshkim maksimal për të gjitha rastet që implikojnë të mitur në aktivitete kriminale.