Sjellja e kryetares së Kuvendit, Elisa Spiropali, në konferencën e së enjtes ka shkaktuar një valë kritikash të ashpra në radhët e gazetarëve dhe shoqërisë civile. Asociacioni i Gazetarëve të Shqipërisë (AGSH) ka reaguar publikisht ndaj asaj që cilëson si një mashtrim institucional dhe propagandë e pastër, pas vendimit të njëanshëm të Spiropalit për të mos lejuar pyetje në një event të paraqitur si “konferencë për shtyp”.
Në njoftimet zyrtare drejtuar mediave për datat 4 dhe 5 qershor, ngjarja ishte prezantuar si një konferencë e hapur për gazetarët. Por, në mënyrë të papritur dhe pa paralajmërim, znj. Spiropali e shndërroi takimin në një deklaratë të mbyllur, duke refuzuar çdo lloj pyetjeje nga media.
Kjo është më shumë sesa një keqkomunikim. Është një akt i qëllimshëm i shmangies nga përgjegjësia publike. Një institucion i nivelit të Kuvendit nuk mund të lejojë vetes të përdorë etiketa të rreme për të zhvilluar thjesht një shfaqje propagandistike pa llogaridhënie reale. Një komunikim njëdrejtimësh nuk është konferencë për shtyp. Është propagandë.
AGSH e cilëson këtë precedent si jashtëzakonisht të rrezikshëm për standardet demokratike, duke vënë në pikëpyetje transparencën institucionale, respektin për rolin e medias, dhe lirinë e fjalës në një vend që pretendon se funksionon mbi themelet e shtetit të së drejtës.
Në vend që të garantojë dialog, informim dhe përgjegjshmëri – elementë të domosdoshëm në një demokraci funksionale – Spiropali zgjodhi heshtjen autoritare.
Përfundimi është i qartë:
Kuvendi i Shqipërisë është kthyer, me veprime të tilla, në një arenë të kontrolluar të propagandës politike, ku mediat nuk janë të mirëpritura si zëra kritikë, por të trajtuara si pengesë për narrativën zyrtare. AGSH ka bërë thirrje për rikthimin urgjent të normalitetit në raportet institucionale me median, por dëmi është bërë: liria e medias është cenuar publikisht dhe pa asnjë ndjesë.