Kryeministri Edi Rama ka reaguar ashpër ndaj debatit mbi aksionin e IKMT-së për shembjen e ndërtimeve pa leje në Theth, gjatë takimit me deputetët dhe kryebashkiakët për performancën lokale. Ai e quajti të papranueshme përpjekjen për të viktimizuar ndërtuesit dhe e theksoi se nuk do ketë asnjë tolerim.
“Nuk do të ketë asnjë tolerim,” tha Rama, duke sqaruar se aksioni do të vazhdojë deri në lirimin e të gjithë hapësirës së zaptuar nga 40 subjekte, shumica prej të cilëve, sipas tij, nuk janë as banorë të zonës.
Rama u shpreh:
“Nuk bëhet fjalë për disa njerëz të shkretë, por individë që në një pjesë të konsiderueshme nuk janë banorë të vendit dhe që nuk janë shfaqur as për të pretenduar çfarëdo qoftë.”
Kryeministri theksoi se Policia e Shtetit po heton për të identifikuar se kush fshihet pas këtij “pushtimi kriminal” të zemrës së Thethit, duke shtuar se ndërtimet janë bërë me qëllime përfitimi, jo për banim.
Ai shprehu habinë për qëndrimin e disa përfaqësuesve të komunitetit fetar që, sipas tij, e kanë interpretuar gabimisht situatën:
“U habita sesi një njeri i Zotit kishte folur për këtë histori sikur ne i joshëm, i gënjyem dhe i premtuam legalizim. Ne nuk kemi prerë askënd në besë.”
Sipas Ramës, qeveria ka premtuar legalizimin e shtëpive të vjetra, dhe jo të ndërtimeve të reja dhe të paligjshme. Ai përmendi gjithashtu përgjegjësinë e strukturave shtetërore dhe kritikoi prokuroren Elsa Gjeli për mosveprim:
“Mbetet për t’u parë çfarë do të marrë KLP për zonjën Gjeli, e cila nuk ka pranuar të nisë as hetimin.”
Rama theksoi se prokuroria nuk ka hapur asnjë hetim, ndërsa Bashkia e Shkodrës ka marrë përgjegjësinë për ndërhyrjen.
Çfarë po ndodh në Theth?
Po zhvillohet një aksion për shembjen e ndërtimeve pa leje, i udhëhequr nga IKMT dhe i mbështetur nga qeveria.
Sa ndërtime janë prekur?
Deri më tani janë goditur 40 subjekte, disa prej të cilëve kishin më shumë se një objekt.
Pse ka reagime kundër?
Banorë dhe përfaqësues fetarë pretendojnë se janë mashtruar nga shteti dhe i janë premtuar legalizime.
Cili është qëndrimi i Ramës?
Rama mohon çdo premtim të tillë dhe thekson se ndërtimet e reja pa leje nuk do legalizohen. Ai akuzon një pjesë të ndërtuesve si individë që synonin fitim dhe jo strehim.
Cili institucion kritikohet për mosveprim?
Prokuroria e Shkodrës dhe konkretisht prokurorja Elsa Gjeli, për të cilën Rama sugjeron hetim disiplinor.