Në një takim maratonë me përfaqësues të teknologjisë, kryeministri Edi Rama shpalli një nga ambiciet më të guximshme të qeverisë për vitet e ardhshme: shndërrimi i Shqipërisë në një vend “cashless”, pa pagesa fizike me para në dorë, deri në fund të kësaj dekade.
Synimi: Pagesa 100% Digjitale
“Deri në fund të dekadës, Shqipëria duhet të jetë një vend ku të gjitha transaksionet financiare zhvillohen digjitalisht, pa pagesa me para në dorë,” – tha Rama. Ai e cilësoi këtë proces si një çlirim të vendit nga një barrë pluhuri dhe ferrash, duke iu referuar informalitetit, korrupsionit dhe vështirësive në jetën e përditshme që lidhen me ekonominë e parasë cash.
Sipas tij, nuk është problem i teknologjisë – pasi infrastruktura ekziston – por i vullnetit politik dhe kulturës së përditshme. “Na duhet një sforco e madhe dhe goxha sensibilizim,” shtoi ai, duke i bërë thirrje edhe institucioneve private, bankave dhe sektorit financiar që të marrin pjesë aktive.
Agjencia E Inovacionit Do Reformohet
Rama njoftoi gjithashtu se Agjencia Kombëtare e Shoqërisë së Informacionit (AKSHI) do të kalojë në një fazë të re zhvillimi, për t’u bërë një motor real për digjitalizimin total të shërbimeve.
“Duhet ta çojmë në një nivel tjetër agjencinë e inovacionit. Dokumenti që do të përgatitet duhet të jetë i lirë, krijues, pa kufij – as financiarë, as teknikë,” tha ai, duke paralajmëruar një valë të re reformash në qeverisjen digjitale.
Çfarë nënkupton Shqipëri “cashless”?
Që të gjitha pagesat dhe transaksionet financiare – nga kafja te taksat – të bëhen përmes bankave, aplikacioneve, kartave ose platformave digjitale, dhe jo me para në dorë.
Kur pritet të realizohet ky synim?
Kryeministri Rama ka deklaruar se afati është fundi i dekadës, pra deri në vitin 2030.
Pse është i rëndësishëm ky transformim?
Sepse ndihmon në luftën kundër korrupsionit, evazionit fiskal, ul informalitetin dhe rrit transparencën në ekonominë publike dhe private.
A është ky një proces i lehtë?
Jo. Rama vetë pranoi se “duhet një sforco e madhe” dhe sensibilizim, sidomos në një shoqëri ku ende dominon pagesa me para cash.