Kryeministri Edi Rama ka ndërmarrë një riformatim të plotë të drejtimit të Bashkisë së Tiranës, duke shkarkuar Anuela Ristanin së bashku me të gjithë nënkryetarët e bashkisë. Vendimi është bërë i ditur gjatë një mbledhjeje me deputetët e qarkut dhe drejtuesit vendorë, ku Rama është shprehur se “duhen burime të tjera njerëzore” për të menaxhuar sektorët e bashkisë deri në mbajtjen e zgjedhjeve.
Nga brenda strukturave bashkiake, mësohet se zëvendëskryeministrja Belinda Balluku ka nisur një seri intervistash me drejtuesit e drejtorive, duke lënë jashtë procesit Anuela Ristanin, e cila nuk është ftuar në takimet zyrtare.
Gjatë mbledhjes, drejtuesit kanë raportuar për situatën në zonat përkatëse, ndërsa Rama ka përmendur pozitivisht vetëm Inspektoratin e Mbrojtjes së Territorit (IMT) dhe Policinë Bashkiake, edhe pse edhe këto struktura, sipas tij, kanë mangësi të theksuara.
Ky vendim vjen pas një vale ndryshimesh të thella në administratën vendore, duke konsoliduar ndikimin e ri politik në drejtimin e Bashkisë Tiranë dhe duke lënë të kuptohet se asnjë funksionar i mëparshëm nuk është i paprekshëm.