Më 22 korrik 2025, Meriton Mjekiqi dhe vëllai i tij, Rinor Mjekiqi, janë arrestuar nga Policia e Kosovës, lidhur me një rast të lëndimit të rëndë trupor që ka ndodhur më 11 korrik 2025.
Sipas të dhënave të siguruara nga Sinjali, të dy vëllezërit ishin në arrati që nga dita e incidentit. Ata u paraqitën vullnetarisht në Stacionin Policor në Obiliq rreth orës 15:00, ku u morën në pyetje në prani të avokatëve të tyre.
Ngjarja në fjalë lidhet me një përleshje fizike, nga e cila Egzon Grajqevci ka mbetur i plagosur rëndë. Deri më tani, nuk janë bërë të ditura detajet rreth shkakut të sherrit dhe kush ka iniciuar konfliktin, por autoritetet e hetimit po punojnë për zbardhjen e plotë të rrethanave.
Pas marrjes në pyetje, Prokurori i Shtetit ka urdhëruar ndalimin policor për 48 orë ndaj të dyshuarve, ndërkohë që procedura penale është në vijim.
Meriton Mjekiqi është një emër i njohur për publikun shqiptar, si prezantues dhe figurë televizive, çka e bën këtë ngjarje edhe më të bujshme në opinionin publik.
Hetimet pritet të sjellin më shumë detaje në ditët në vijim.