Një tjetër skandal godet kompaninë Bankers Petroleum, ndërsa dosja e prokurorisë zbulon se kompania gjigante ka paguar miliona për të mbyllur gojët e mediave dhe për të fshehur protestat e punëtorëve. Përmes kontratave të fryra reklamash, Bankers ka shpërndarë shuma marramendëse në televizionet kryesore shqiptare – për të siguruar heshtjen e tyre përballë pakënaqësive dhe revoltës sociale të puntorëve.
Blerja e heshtjes: Si u mbyll protesta e 1 Majit
Protesta e punëtorëve të Bankers më 1 Maj 2025, për kushte të vështira pune, u raportua vetëm nga pak media si Syri.net, News24 dhe RTSH, ndërsa TV Klan dhe Top Channel nuk transmetuan asgjë. Sipas përgjimeve të prokurorisë, arsyeja ishte e qartë: pagesat e Bankers për të “mbyllur sytë” ndaj protestës.
Në dosjen hetimore theksohet:
“Media si Top Channel dhe TV Klan kanë marrë gjatë viteve 2020-2025 shuma nga 26 milionë deri në 55 milionë lekë, për reklama, spote dhe hapësira publicitare. Në një treg ku Bankers është pa konkurencë, këto shpenzime rezultojnë të pajustifikuara, dhe përdoren për të penguar publikimin e lajmeve negative dhe zërat kritikë kundër kompanisë.”
Përgjimet zbulojnë marrëveshjet nën dorë
Në një bisedë të përgjuar më 29 prill 2025, shtetasi Hongping Xiao, drejtori i Bankers, i kërkon personit, Laura Dashi, të garantojë që Top Channel nuk do të raportojë protestën e 1 Majit. Ajo i përgjigjet qartë:
“Top Channel nuk do të vijë. Kemi kontratë, është 100% e sigurt.”
Duke diskutuar për mediat që mund të ishin të pranishme, Xiao kërkon të sigurojë që edhe Klan të mos raportojë. Bashkëbiseduesja e tij pohon se situata me Klan është “delikate”, por do të “rregullojnë gjërat”.
Shantazhi dhe përpjekja për të zgjatur kontratat
Një tjetër bisedë më 24 prill 2025 zbulon përpjekjet për të zgjatur kontratën me Top Channel, që sipas Xiao, nuk ka ofruar asnjë shërbim për muaj me radhë, por kërkon të realizojë një program investigativ për taksën e papaguar prej 120 milionë lekësh nga Bankers.
“Nuk e di çfarë ndodhi me Top Channel vitet e fundit. Shumicën e rasteve mbulojnë me heshtje… E mbulojnë me maska,” – shprehet Xiao.
Por më pas ai pranon se televizioni i ka kërcënuar me një program kritik:
“Na kanë dërguar email: Jemi duke përgatitur një program për taksën e ushtrimit…”
Përdorimi i reklamave si mjet presioni
Sipas dosjes së prokurorisë, Bankers ka përdorur reklamat si instrument për të kontrolluar narrativën publike. Në vend që të përballen me kërkesat e punëtorëve për paga më të mira dhe kushte pune dinjitoze, drejtuesit e kompanisë kanë investuar në “pazare mediatike” për të fshehur të vërtetën.
Ky skandal hedh dritë mbi një praktikë të njohur në Shqipëri, ku kompanitë dhe institucionet blejnë heshtjen e mediave përmes reklamave – një realitet që dëmton rëndë lirinë e medias dhe të drejtën e publikut për informacion.
Çfarë zbulon dosja e prokurorisë për Bankers Petroleum?
Që kompania ka paguar miliona lekë për reklama në mediat kryesore me qëllim që të mos raportohen protestat e punëtorëve të saj.
Cilat media janë përmendur si përfituese?
Top Channel dhe TV Klan janë përmendur si përfituese të kontratave të reklamave, duke mos raportuar protesta të verifikuara si reale nga punëtorët e Bankers.
Si justifikon Bankers këto shpenzime?
Zyrtarisht për “reklamim”, por në praktikë, ato përdoren për të mbuluar lajme të dëmshme për imazhin e kompanisë në një treg pa konkurrencë.
Çfarë pasojash ka kjo për gazetarinë?
Minon lirinë e medias, dëmton gazetarinë e pavarur dhe manipulon të drejtën e publikut për informacion të paanshëm.
Ky është vetëm një nga shembujt sesi korporatat mund të minojnë të vërtetën, dhe një alarm për të gjithë shoqërinë shqiptare – që përballë një loje kaq të pistë mes parasë dhe informacionit, të kërkojë llogari dhe transparencë.