Kreu i Partisë Demokratike, Sali Berisha, ka reaguar pas lajmit të hidhur për ndarjen nga jeta të gazetarit, publicistit dhe analistit të njohur Artur Zheji. Në një postim në Facebook, Berisha e përshkroi Zhejin si një figurë të spikatur të medias dhe mendimit kritik shqiptar, duke u shprehur i tronditur nga vdekja e parakohshme e tij.
“Gazetari, analisti, botuesi, publicisti i mirënjohur Artur Zheji mbylli sot, papritmas dhe parakohe, sytë përgjithmonë. Duke shprehur ngushëllimet e mia më të ndjera familjes, miqve dhe të afërmve, unë lutem së bashku me ta që shpirti i Arturit të tyre të dashur të gjejë paqen e merituar. Amin”, – shkruan Berisha.
Një humbje e ndjerë për median shqiptare
Vdekja e Zhejit ka tronditur botën e medias dhe opinionin publik. Ai ishte një publicist i mprehtë, mendimtar erudit dhe zë kritik, i cili për vite me radhë kontribuoi në formësimin e debatit publik me shkrime, analiza dhe drejtimin e emisioneve televizive.
Zheji, pinjoll i një familjeje të shquar intelektuale – i biri i Petro Zhejit dhe aktores Besa Imami – la një trashëgimi të vyer në gazetarinë dhe kulturën shqiptare.
Reagime të shumta
Përveç Berishës, edhe figura të tjera politike, mes tyre Ilir Meta dhe Edi Rama, shprehën ngushëllimet e tyre për këtë humbje të madhe. Reagimet e tyre përqendrohen tek fakti se ndarja nga jeta e Zhejit ishte e papritur dhe e dhimbshme, duke lënë boshllëk në jetën publike shqiptare.