Në samitin e zhvilluar në Pekin, ku morën pjesë liderët e Kinës, Rusisë dhe Koresë së Veriut, vëmendja nuk u përqendrua vetëm tek politika e madhe globale, por edhe tek një figurë e re që po hyn në skenë: vajza e Kim Jong-un, Ju Ae.
Një debutim në arenën ndërkombëtare
Kim Jong-un, i cili për herë të parë që nga marrja e pushtetit në vitin 2011 mori pjesë në një samit të tillë ndërkombëtar, zgjodhi ta shoqërojë vajzën e tij adoleshente. E vendosur vetëm një hap pas të atit, Ju Ae u prit me protokoll shtetëror nga figura të larta të Partisë Komuniste të Kinës dhe nga ministri i Jashtëm, Wang Yi.
Analistët ndërkombëtarë e cilësojnë këtë si daljen e parë të saj në arenën globale, një sinjal i qartë se mund të jetë trashëgimtarja e ardhshme e regjimit.
Simbolika e zgjedhjes
Vërehet se Kim nuk e mori me vete as bashkëshorten, Ri Sol Ju, dhe as motrën e tij me ndikim, Kim Yo-jong. Në vend të tyre, ai solli vajzën, duke i dhënë asaj një rol simbolik si “figurë të re udhëheqëse”.
Ju Ae ka qenë e pranishme në publik që prej fundvitit 2022, shpesh në aktivitete ushtarake. Koreja e Veriut ka lëshuar madje edhe pulla postare me imazhin e saj, duke e kaluar propagandën nga përshkrimi si një “fëmijë i dashur” tek një “vajzë fisnike” dhe së fundmi tek një “figurë e madhe udhëheqëse”.
Përgatitja për pushtet
Pamja e saj ka ndryshuar me shpejtësi: nga veshjet e bardha të fëmijërisë në xhaketa të zeza lëkure, duke u paraqitur gjithnjë e më shumë si një figurë politike e rritur.
“Duke e shoqëruar vajzën në raste të mëdha publike, Kim Jong-un po e përgatit për lidership dhe po ndërton një konsensus për të që në moshë të re,” – shpjegon Cheong Seong-Chang, analist në Institutin Sejong në Seul.
Një trashëgimtare në regjim patriarkal?
Tradicionalisht, pushteti në Korenë e Veriut është trashëguar nga babai tek djali. Megjithatë, fakti që Ju Ae po merr kaq shumë ekspozim publik ngjall spekulime se mund të jetë favoritja e babait për ta pasuar. Raportimet sugjerojnë se Kim ka edhe një djalë, ndoshta më i madh, por ai nuk është shfaqur kurrë në publik.
Analistët theksojnë se është ende herët për të folur me siguri, pasi Kim është vetëm 41 vjeç, megjithëse problemet e tij shëndetësore kanë hapur debat mbi pasardhjen.
Kjo shfaqje e re në Pekin shihet si një hap i rëndësishëm në konsolidimin e dinastisë Kim, ku për herë të parë, një vajzë mund të projektohet si trashëgimtare e pushtetit absolut në një nga regjimet më të mbyllura të botës.