Shefja e kabinetit të kryeministrit Vali Bizhga ka dhënë dorëheqjen nga posti që mbante prej shumë vitesh pranë Edi Ramës. Bizhga është njohur si një nga bashkëpunëtoret më të afërta të kryeministrit, duke qenë pjesë e ekipit të tij që prej kohës kur ai drejtonte Bashkinë e Tiranës.
Megjithëse ka mbajtur një profil publik të ulët, ajo është konsideruar si një figurë kyçe në strukturën drejtuese të Kryeministrisë. Burime pranë institucionit bëjnë të ditur se arsyeja e dorëheqjes lidhet me probleme shëndetësore, të cilat e kanë detyruar të tërhiqet nga funksionet ekzekutive.
Pasardhësja, një tjetër grua në krye të kabinetit
Në vend të saj është zgjedhur Vilma Premti, e cila deri para pak ditësh mbante detyrën e shefes së kabinetit të kryetares së Gjykatës Kushtetuese, Olta Zaçaj. Premti pritet të marrë zyrtarisht detyrën e re si shefe e kabinetit të kryeministrit në ditët në vijim.
Ky zhvillim vjen si një surprizë në skenën politike, pasi pritet që ndryshimi në kabinetin ekzekutiv të sjellë edhe riorganizime të tjera në strukturën qeveritare.