Kanë nisur homazhet në nderim të gjyqtarit të ndjerë Astrit Kalaja, i cili u vra dy ditë më parë në sallën e gjyqit të Gjykatës së Apelit.
Mes pjesëmarrësve në homazhe ishte edhe Kryetari i Gjykatës së Lartë, Sokol Sadushi, i cili bëri një deklaratë të fortë për gjendjen e sigurisë në sistemin gjyqësor shqiptar.
Sadushi theksoi se gjendja aktuale e gjykatave është e papranueshme dhe kërkoi marrjen e menjëhershme të masave për të garantuar sigurinë e gjyqtarëve në ushtrimin e detyrës së tyre.
“Duhen marrë masa pasi gjendja në gjykatat shqiptare është e papranueshme, siguria në nivelin zero. Një gjendje e tillë nuk mund të lejohet më. Gjyqtarët duan siguri që të japin drejtësi,” – deklaroi Sadushi.
Ngjarja tragjike që i mori jetën gjyqtarit Kalaja ka tronditur opinionin publik dhe ka nxitur reagime të shumta nga figura të larta të drejtësisë, përfshirë edhe kreun e GJKKO-së, Erjon Bani, i cili pak më herët kërkoi ndërtimin e godinave të reja për gjykatat dhe e cilësoi situatën si “moment reflektimi për të gjithë sistemin”.
Ngjarja e rëndë pritet të sjellë rishikime të thella mbi masat e sigurisë, infrastrukturën dhe mbështetjen institucionale për trupën gjyqësore, e cila gjithnjë e më shumë ndodhet në presion dhe rrezik gjatë ushtrimit të detyrës.