Një ditë para takimit me presidentin ukrainas Volodymyr Zelensky në Shtëpinë e Bardhë, Presidenti i Shteteve të Bashkuara, Donald Trump, ka zhvilluar një bisedë të gjatë me Vladimir Putin, duke paralajmëruar se do të publikojë përmbajtjen e saj.
Trump e bëri njoftimin në rrjetin e tij Truth Social, duke theksuar se “biseda është ende duke u zhvilluar” dhe se “do të tregohet për përmbajtjen e saj” pas përfundimit. Në anën tjetër, pritet që edhe presidenti rus të publikojë versionin e tij të komunikimit.
Takimi Trump–Zelensky në Uashington do të fokusohet në kërkesën e Kievit për më shumë mbështetje ushtarake nga SHBA, përfshirë edhe raketat Tomahawk, të cilat do ta vendosnin Moskën dhe qytetet kryesore ruse brenda rrezes së sulmeve nga territori ukrainas.
Trump është zotuar publikisht se do ta përfundojë luftën në Ukrainë, por ka shprehur zemërim ndaj Putinit për sulmet e vazhdueshme ndaj infrastrukturës energjetike ukrainase.
Ndërkohë, në valën e fundit të sulmeve, Rusia ka lëshuar mbi 300 dronë dhe 37 raketa, duke goditur qendra të furnizimit me energji elektrike në gjithë Ukrainën. Lufta po hyn në vitin e saj të katërt, me një përshkallëzim të ndjeshëm të tensioneve diplomatike dhe ushtarake.