Një ngjarje e rëndë është shënuar këtë të enjte në aksin Fier–Vlorë, pranë fshatit Bishan, ku një burrë është gjetur pa shenja jete brenda një automjeti të parkuar në xhepin e emergjencës.
Sipas burimeve zyrtare, trupi i pajetë i identifikuar si Rafael Pasha, banues në fshatin Starovë të Beratit, është gjetur në sediljen e parme të një makine Volkswagen me targa AB276DC.
Në njoftimin e Policisë thuhet:
“Sot, më datë 16.10.2025, në autostradën Fier–Vlorë, pranë fshatit Bishan, është gjetur i ndaluar në xhepin e emergjencës automjeti i markës Volkswagen me një shtetas të seksit mashkull të shtrirë në sediljen e parme. Nga informacionet e para, ky shtetas dyshohet të ketë ndërruar jetë nga shkaqe natyrale.”
Autoritetet kanë bërë të ditur se në vendngjarje kanë mbërritur shërbimet e policisë dhe ambulanca, ndërsa trupi i pajetë është dërguar në morg për kryerjen e autopsisë, me qëllim përcaktimin e saktë të shkakut të vdekjes.
Familjarët janë njoftuar menjëherë, ndërsa grupi hetimor po punon për të dokumentuar ngjarjen dhe për të sqaruar nëse bëhet fjalë për ndonjë komplikacion shëndetësor apo rrethanë tjetër që çoi në ndalimin e mjetit dhe vdekjen e tij brenda automjetit.