Pas një seance maratonë 12-orëshe të mbushur me debate dhe tensione, opozita vendosi të braktisë sallën e Kuvendit pasi Partia Socialiste rrëzoi kërkesat për ngritjen e dy komisioneve hetimore, një për çështjen McGonigal dhe tjetrin për zgjedhjet e 11 majit.
Vendimi i shumicës u prit me reagime të ashpra nga opozita. Sali Berisha, në një deklaratë të fortë politike, e quajti aktin “fundin e parlamentit”, duke paralajmëruar përgjigje jashtë sallës:
“Me këtë vendim, ju vetëm sa firmosni fundin e parlamentit… ne do iu përgjigjemi,” – tha Berisha, përpara se opozita të largohej në grup.
Socialistët, nga ana tjetër, e justifikuan refuzimin me argumentin se Kuvendi nuk mund të hetojë çështje të mbyllura nga drejtësia e huaj.
“Kuvendi i Shqipërisë nuk heton procese penale të mbyllura nga drejtësia amerikane,” – deklaroi Bledi Çuçi, duke iu referuar rastit McGonigal.
Në seancë, përplasjet politike u shoqëruan edhe me momente groteske dhe personale, ku debati mes Berishës dhe ministrit të Drejtësisë, Ulsi Manja, degjeneroi në ironi për “xhaketat dhe çantat luksoze”. Për disa minuta, çmimi i kostumeve zëvendësoi temat e reformës në drejtësi dhe të hetimeve parlamentare, duke e shndërruar Kuvendin në një skenë sarkazme politike.
Në fund, opozita u largua pa rezultat, ndërsa mazhoranca vazhdoi procedurat e saj në heshtje, duke mbyllur një tjetër seancë që dëshmoi thellimin e krizës institucionale dhe mungesën e dialogut politik në Shqipëri.
.