Drejtori i Policisë së Shtetit, Ilir Proda, ka ndërmarrë një lëvizje të menjëhershme pas ngjarjes së rëndë të ndodhur në Devoll, ku 32-vjeçari Ilir Topçiu u mor me forcë nga banesa e tij, u mbajt për disa orë dhe u dhunua fizikisht. Si pasojë e hetimeve paraprake, janë arrestuar tre persona: Alti Nallbati (vëllai i deputetit të PD Bledion Nallbati), Marsel Buci dhe Trajan Çeliku.
Pas analizës së kryer nga Drejtoria e Përgjithshme e Policisë, rezultoi se zinxhiri drejtues i DVP Korçë nuk kishte përmbushur detyrimet ligjore dhe nuk kishte menaxhuar në mënyrë të duhur situatën, duke dëmtuar imazhin e policisë në komunitet.
Në reagim ndaj kësaj, Ilir Proda ka firmosur:
- Shkarkimin nga detyra të Drejtorit të Policisë së Korçës, Erion Ahmeti.
- Pezullimin e Zëvendësdrejtorit për Hetimin e Krimit, Hajri Kushe, deri në përfundimin e hetimit disiplinor.
Po ashtu, është urdhëruar një hetim disiplinor për gjithë zinxhirin drejtues të Drejtorisë Vendore të Policisë Korçë dhe të Komisariatit të Policisë Devoll, bazuar në nenin 121 të ligjit “Për Policinë e Shtetit”.
Derisa të përfundojë konkursi për drejtor vendor, në krye të DVP Korçë është caktuar përkohësisht Islor Islami, i cili më parë mbante detyrën e drejtorit të Kufirit dhe Migracionit në Kukës.
Në njoftimin zyrtar, Policia e Shtetit thekson se po analizon me përgjegjësi çdo rast mosveprimi profesional dhe do të marrë masa ndëshkimore në përputhje me ligjin dhe rregulloren e saj të brendshme.