Gjykata e Lartë është përfshirë në një debat të ri institucional, pasi hetimet e fundit zbulojnë mospërputhje dhe standarde të dyfishta në mënyrën se si janë trajtuar fletët e votimit për përzgjedhjen e anëtarëve të Gjykatës Kushtetuese në periudhën 2022–2025.
Dy standarde në të njëjtën gjykatë
Nën drejtimin e Sokol Sadushit, Gjykata e Lartë ka asgjësuar fletët e votimit të përdorura në rastet e mëparshme, duke i quajtur ato “pa vlerë juridike”. Megjithatë, në procesin e fundit të përzgjedhjes mes Asim Vokshit dhe Naureda Llagamit, të gjitha fletët e votimit janë ruajtur dhe janë përfshirë si pjesë zyrtare e dokumentacionit të institucionit.
Kjo sjellje kontradiktore është konfirmuar nga vetë Gjykata, e cila në përgjigje të një kërkese për informacion nga Top Channel, ka deklaruar se fletët e votimit nuk janë akte juridike, por “dokumente ndihmëse që humbin vlerën pas certifikimit të rezultatit”.
Megjithatë, analizat e procesverbaleve zyrtare tregojnë se nuk është aplikuar një standard i unifikuar në rastet e mëparshme, duke krijuar dyshime për selektivitet institucional.
Rastet e mospërputhjeve
Në procesverbalin e votimit të Sandër Beci, për shembull, shënohen katër fletë të pavlefshme me shpjegime të detajuara për secilën. Ndërsa në zgjedhjen e Holta Zaçajt, dokumenti përmend vetëm “tre fletë të pavlefshme” pa asnjë sqarim shtesë.
Në rastin më të fundit, ku Asim Vokshi u shpall fitues me tre vota më pak se Naureda Llagami, procesverbali përfshin të gjitha rezultatet e fletëve dhe shënimet për pavlefshmëritë, ndryshe nga praktikat e mëparshme.
Kërkesat për informacion shtesë mbi mënyrën e vlerësimit të fletëve në raste të tjera kanë mbetur pa përgjigje konkrete. Zyrtarisht, Gjykata nuk i mohon as i konfirmon ekzistencën e tyre — fakt që lë hapur dyshimet për zhdukjen e dokumenteve.
Dyshime për mungesë transparence dhe paanshmërie
Praktika e ruajtjes selektive të dokumenteve dhe interpretimet e ndryshme në procesverbale cenojnë parimin e barazisë dhe transparencës, sipas vëzhgimeve të mediave. Kjo situatë, e ndodhur në një prej institucioneve më të larta të drejtësisë, ngre shqetësime serioze për besueshmërinë e Gjykatës së Lartë dhe rolin e saj si garant i drejtësisë kushtetuese.
Ekspertët e drejtësisë theksojnë se mungesa e uniformitetit procedural mund të përdoret si precedent për të manipuluar proceset e ardhshme të votimit, duke ndikuar në mënyrë të drejtpërdrejtë përbërjen e institucioneve të drejtësisë. top-channel.tv