Në dosjen hetimore të SPAK për tunelin e Llogarasë janë përfshirë edhe biseda mes zëvendëskryeministres Belinda Balluku dhe ish-drejtorit të ARRSH-së, Evis Berberi, të përftuara nga telefoni i tij tip Blackberry.
Mes komunikimeve të vitit 2022, del se në zyrat e qeverisë kanë kërkuar zgjidhje edhe deputetë të Partisë Demokratike, mes tyre Arbi Agalliu, i cili sipas dosjes kishte interesa për tokat e tij në Vlorë.
Pjesë Nga Dosja
Sipas aktit të ekspertimit të celularit të sekuestruar, më 27 janar 2022, Balluku i shkruan Berberit:
“Do të të marr për një takim Arber Agalliu, deputet i PD që ka një dy pyetje për dy toka që ka në Vlorë, një tek bypass dhe një në hyrje të autostradës. Qëndrimi shumë i dashur, shumë i mirë se është djalë qytetar.”
Berberi përgjigjet:
“Patjetër. E kemi patriot.”
Balluku shton:
“Por ne nuk kemi ça bëjmë, të marrim lejen e ndërtimit nga bashkia, atëherë shprehemi.”
Ndërsa Berberi ia kthen:
“Ok. Ne japim mendim pasi ka marrë leje.”
Më pas, më 31 janar 2022, Agalliu i dërgon mesazh vetë Berberit duke i kërkuar një takim:
“Evisi si je? Arbi Agalliu jam! Belinda më dha numrin tënd. Kur të kesh mundësi, doja të flisnim pak.”
Të nesërmen, më 1 shkurt 2022, sipas të dhënave, ata janë takuar, dhe Berberi e ka njoftuar Ballukun:
“Sa përcolla Agalliun.”
Detaje Nga Hetimet
Bisedat janë pjesë e materialeve të sekuestruara nga SPAK gjatë hetimeve për abuzime me tenderin e tunelit të Llogarasë, ndërsa në komunikime të tjera të publikuara, Balluku përdor tone të ashpra ndaj bashkëpunëtorëve.
Ndërkohë, vetë Agalliu nuk ka reaguar publikisht për përmendjen e tij në dosje.