Një incident i rëndë ka ndodhur në ambientet e Bashkisë së Pogradecit, gjatë një mbledhjeje të Këshillit Bashkiak me praninë e qytetarëve. Ngjarja, që degjeneroi në përplasje fizike, ka përfunduar me arrestimin e një 27-vjeçari, ndërsa dëshmitarët thonë se ai nuk ishte personi që nisi konfliktin.
Sipas njoftimit zyrtar të Policisë së Shtetit, specialistët për Hetimin e Krimeve në Komisariatin e Pogradecit kanë arrestuar në flagrancë shtetasin K. M., banues në Pogradec, për veprën penale “Goditje për shkak të detyrës”.
Ngjarja ndodhi rreth orës 14:25 të datës 10 nëntor 2025, në sallën e bashkisë, ku po zhvillohej mbledhja e këshillit me praninë e qytetarëve. Sipas policisë, i riu fillimisht ka debatuar dhe ofenduar disa këshilltarë, përpara se të godiste me grusht një prej tyre, E. Sh., 47 vjeç.
Megjithatë, sipas disa dëshmitarëve të pranishëm në sallë dhe pamjeve filmike të transmetuara në media, përplasja nisi pasi vetë këshilltari E. Sh. është ngritur me tone agresive dhe ka tentuar të godasë i pari të riun pas një debati verbal.
Pavarësisht këtyre dëshmive, policia nuk ka ndërmarrë asnjë veprim ndaj këshilltarit bashkiak, duke sjellë reagime të ashpra nga qytetarët për standardin e dyfishtë në zbatimin e ligjit.
Trupa e policisë vijon hetimet për të zbardhur plotësisht rrethanat e ngjarjes, ndërsa komuniteti lokal kërkon transparencë dhe trajtim të barabartë të palëve të përfshira.