Një zjarr i papritur në një nga kazanet e mbeturinave në zonën e Bllokut ka shkaktuar panik mbrëmjen e sotme, në një nga segmentet më të frekuentuara të kryeqytetit. Ngjarja ndodhi pranë një blloku të dendur pallatesh dhe bizneseve, duke alarmuar qytetarët që po kalonin aty afër.
Flakët dhe tymi i dendur u përhapën me shpejtësi, ndërsa automjetet në trafik u detyruan të ngadalësonin për shkak të pamjes së kufizuar dhe situatës së krijuar. Disa qytetarë u larguan me nxitim, të shqetësuar se zjarri mund të përhapej në mjediset përreth.
Sipas informacioneve paraprake, dyshohet se zjarri ka nisur nga hedhja e materialeve të ndezshme në kazan, megjithatë shkaku ende nuk është konfirmuar. Ekipet e policisë mbërritën menjëherë në vendngjarje, duke bërë perimetrimin e zonës dhe duke mundësuar qarkullimin e kontrolluar të mjeteve.
Shërbimi zjarrfikës po punon për shuarjen e plotë të flakëve dhe për të parandaluar çdo rrezik të mëtejshëm. Deri tani nuk raportohet për të lënduar, por dëmet materiale janë të dukshme në zonën përreth kazanit.
Banorët e lagjes kërkojnë hetim të plotë të ngjarjes dhe masa më të rrepta për menaxhimin e mbetjeve, pasi raste të tilla janë bërë të shpeshta në Tiranë, sidomos gjatë orëve të mbrëmjes.
Policia ka nisur hetimet për sqarimin e plotë të rrethanave.