Reshjet intensive të shiut dhe stuhia e 24 orëve të fundit kanë shkaktuar dëme të konsiderueshme në sektorin bujqësor, duke goditur rëndë prodhimin e luleshtrydheve në zonën e Fierit. Në Njësinë Administrative Cakran, bashkia Fier, në fshatin Buzemadh, janë shkatërruar plot 1.2 hektarë serra.
Pamjet nga terreni tregojnë dëmtim masiv të strukturave të serrave, shembje të plastikave mbuluese dhe përmbytje të parcelave, duke rrezikuar jo vetëm prodhimin aktual, por edhe ciklin e ardhshëm të kultivimit.
Kjo zonë është një nga qendrat kryesore të prodhimit të luleshtrydheve në vend, dhe dëmet e shkaktuara nga stuhia pritet të krijojnë pasoja ekonomike për familjet bujqësore që mbështeten te ky aktivitet.
Autoritetet lokale janë njoftuar për situatën, ndërsa pritet vlerësimi zyrtar i dëmeve për të përcaktuar mbështetjen që mund të ofrohet për fermerët e prekur.