Qeveria shqiptare i është drejtuar zyrtarisht Gjykatës Kushtetuese, duke kërkuar ndërhyrjen e saj në konfliktin institucional që ka shpërthyer pas vendimit të GJKKO-së për pezullimin nga detyra të Zëvendëskryeministres dhe Ministres së Infrastrukturës dhe Energjisë, Belinda Balluku. Kjo lëvizje e ekzekutivit synon të ndalojë efektet e menjëhershme të vendimit penal, ndërsa kërkon shfuqizimin e tij si antikushtetues.
Sipas kërkesës së depozituar, qeveria thotë se ka lindur një “mosmarrëveshje kompetencash” midis Kryeministrit dhe Këshillit të Ministrave, nga njëra anë, dhe Gjykatës së Posaçme (GJKKO), nga ana tjetër, lidhur me të drejtën për të pezulluar një anëtar të Këshillit të Ministrave. Ekzekutivi argumenton se GJKKO ka tejkaluar kompetencat, duke ndërhyrë në mënyrë të drejtpërdrejtë në funksionimin e pushtetit ekzekutiv dhe në procesin kushtetues të emërimit dhe shkarkimit të ministrave.
Në dokument theksohen tre kërkesa kryesore:
1. Zgjidhja e konfliktit të kompetencës
Qeveria kërkon që Gjykata Kushtetuese të përcaktojë se cila palë — ekzekutivi apo gjykata penale — ka autoritetin për çështje që prekin anëtarët e kabinetit qeveritar. Sipas argumentimit, pezullimi i një ministri është kompetencë ekskluzive e autoriteteve politike dhe jo e gjykatave të posaçme.
2. Shfuqizimi i vendimit të GJKKO-së
Kërkohet shfuqizimi i vendimit nr. 118, datë 19.11.2025, për pjesën që vendos masën e pezullimit nga detyra. Sipas qeverisë, ky vendim cenon imunitetin kushtetues të ministrit, parimin e ndarjes së pushteteve dhe kompetencat që Kushtetuta ua njeh institucioneve që propozojnë, emërojnë dhe miratojnë anëtarët e qeverisë.
3. Pezullimi i menjëhershëm i efekteve
Ekzekutivi kërkon që efekti i vendimit të GJKKO-së të pezullohet deri sa Gjykata Kushtetuese të përmbyllë shqyrtimin e çështjes, duke synuar rikthimin e përkohshëm të Ballukut në detyrë.
4. Interpretim kushtetues mbi imunitetin
Qeveria kërkon interpretimin e pikës 3 të nenit 103 të Kushtetutës, duke pretenduar se një ministër, si deputet, gëzon të gjitha garancitë procedurale të imunitetit parlamentar, përfshirë kufizimet që legjislacioni penal vendos mbi masat e sigurimit personal.
Relator i çështjes është gjyqtari i Gjykatës Kushtetuese Sander Beci.
Kjo kërkesë hap një nga përplasjet më të forta institucionale të viteve të fundit, ndërkohë që vendimi i Gjykatës Kushtetuese pritet të ketë pasoja të drejtpërdrejta për balancat mes pushteteve dhe për ecurinë e hetimeve të nisura ndaj Belinda Ballukut.