Protesta e paralajmëruar nga Partia Demokratike me emrin “Foltorja 2” nuk arriti pritshmëritë e organizatorëve, si në pjesëmarrje ashtu edhe në kohëzgjatje. Edhe pse ishte marrë leje për një protestë 120-minutëshe, tubimi u mbyll më pak se një orë pas nisjes.
Në shesh u shfaqën vetëm disa deputetë dhe zyrtarë të PD, ndër të cilët morën fjalën Oerd Bylykbashi, Saimir Korreshi dhe më pas Sali Berisha. Disa qytetarë që iu bashkuan protestës mbajtën fjalime të shkruara, ndërsa të tjerë folën spontanisht, por pa krijuar një atmosferë që tërhiqte praninë e publikut më të gjerë.
Pjesëmarrja mbeti e ulët, e ngjashme me protestën e javës së kaluar, megjithëse PD planifikonte që me “Foltoren 2” të shënonte rritje dhe angazhim më të madh qytetar. Tubimi u zhvillua pa incidente dhe u shpërnda qetësisht.
Në përmbyllje, Sali Berisha deklaroi se protestat do të vazhdojnë çdo javë, ndërsa paralajmëroi nisjen e protestave kombëtare, me pretendimin se “e gjithë Shqipëria do të zbresë në shesh” për rrëzimin e qeverisë.
Pavarësisht mesazheve politike dhe thirrjeve të drejtuesve të PD, situata në terren tregoi një mobilizim minimal dhe një tubim që nuk arriti të krijonte impaktin e synuar.