Gjykata Kushtetuese njoftoi se shqyrtimi paraprak i ankimimit të paraqitur nga Kryeministri Edi Rama për rastin “Balluku” do të zhvillohet më 12 dhjetor. Sipas GJK-së, vendimi për shtyrje lidhet me kompleksitetin e çështjes, volumin e materialeve shoqëruese dhe agjendën e ngarkuar të gjykatës, si dhe me kërkesën e disa prej anëtarëve të saj.
Qeveria kërkon heqjen e pezullimit nga detyra për zëvendëskryeministren dhe ministren Belinda Balluku, e cila është njohur me masën e sigurisë nga GJKKO, pasi SPAK e ka shpallur zyrtarisht të pandehur. Kjo çështje ka marrë vëmendje të lartë publike dhe politike, duke shërbyer si test për raportin mes ekzekutivit dhe institucioneve të drejtësisë.
Vendimi i 12 dhjetorit pritet të përcaktojë nëse Balluku do të rikthehet në detyrë apo nëse pezullimi i saj do të qëndrojë në fuqi deri në përfundimin e procesit gjyqësor. Gjykata Kushtetuese, megjithëse e kritikuar shpesh për vonesa, e ka justifikuar shtyrjen me nevojën për shqyrtim të plotë të dokumentacionit dhe natyrën e ndërlikuar të çështjes.