Kreu i Partisë Demokratike, Sali Berisha, ka deklaruar sot se PD është në fazën e përgatitjeve të protestave kombëtare, të cilat – sipas tij – janë e vetmja rrugë për rikthimin e votës së lirë në vend. Berisha e bëri njoftimin në një konferencë nga selia blu, një ditë pasi paralajmëroi të njëjtat protesta gjatë Foltores së organizuar përpara Kryeministrisë.
Berisha akuzon Gjykatën Kushtetuese dhe paralajmëron mobilizim maksimal
Duke iu referuar vendimeve të fundit të Gjykatës Kushtetuese, Berisha i quajti ato “tepër shqetësuese”, duke pretenduar se gjykata nuk ka refuzuar një kërkesë që ai e cilëson si të paligjshme. Ai akuzoi institucionin se më herët kishte shpallur të paligjshëm 30 deputetë të opozitës, vendim të cilin e interpreton si goditje ndaj opozitës dhe një shkelje të Kushtetutës.
Sipas tij, protesta është mjeti i vetëm që mund t’u rikthejë qytetarëve demokracinë dhe një proces zgjedhor të lirë.
“Protesta do të jenë rruga jonë e vetme”
Berisha deklaroi:
“Jemi duke i përgatitur protestat. Vendimet e GJK, fakti që gjykata nuk e refuzoi të paligjshme kërkesën është tepër shqetësuese… Protesta do të jenë rruga jonë e vetme për t’i kthyer shqiptarëve votën e lirë.”
Njoftimi është pritur si një tjetër sinjal për një dimër politik të tensionuar, ku PD kërkon të mobilizojë strukturat në shkallë kombëtare përballë asaj që e cilëson si kapje të institucioneve nga mazhoranca.