Kreu i Partisë Mundësia, , ka reaguar ashpër ndaj daljes së zëvendëskryeministres në zonat e përmbytura, duke e cilësuar këtë veprim si hipokrizi të pastër dhe propagandë politike në kurriz të qytetarëve të dëmtuar nga moti i keq.
Në një deklaratë publike, Shehaj thekson se në një shtet normal, Balluku nuk do të ishte në terren me kamera, por përpara drejtësisë, si çdo qytetare tjetër, pa mandat dhe pa pushtet.
“Në një vend normal, Balluku do të ishte duke u gjykuar para drejtësisë si një qytetare e zakonshme. Belinda jo vetëm që nuk lëshon karrigen, por shkon të ngushëllojë banorët e përmbytur, në një kohë kur me milionat e eurove që ajo ka vjedhur, hidrovoret do të funksiononin, rrugët nuk do të rrëshqisnin si rërë dhe kanalizimet do të ishin në rregull. Nuk është ‘dora e Zotit’, është e korrupsionit”, deklaron Shehaj.
Sipas tij, përmbytjet nuk janë një fatkeqësi e pashmangshme natyrore, por pasojë direkte e keqmenaxhimit, abuzimeve dhe vjedhjes së fondeve publike, që kanë lënë infrastrukturën jetike të vendit pa investime reale dhe pa mirëmbajtje.
Reagimi i Shehajt vjen në një moment kritik politik, kur prej javësh ka kërkuar heqjen e imunitetit dhe arrestimin e Ballukut, ndërsa procesi institucional vijon të zvarritet, duke i dhënë asaj kohë dhe hapësirë për dalje publike dhe veprime propagandistike.
Sipas opozitës, prania e Ballukut në terren nuk është akt solidariteti, por fyerje për qytetarët e përmbytur, të cilët po përballen me humbje banesash, pronash dhe të ardhurash, ndërkohë që përgjegjësit politikë për dështimin e infrastrukturës vazhdojnë të qëndrojnë në pushtet.
Deklaratat e Shehajt shtojnë më tej tensionin politik në një klimë të rënduar, ku përmbytjet kanë nxjerrë sërish në pah ndarjen e thellë mes propagandës qeveritare dhe realitetit të hidhur në terren, duke rikthyer në qendër të debatit përgjegjësinë penale dhe politike për krizën e përsëritur të infrastrukturës në Shqipëri.