Kryeministri deklaroi se Shqipëria ka marrë një ftesë për t’u përfshirë në një strukturë të re ndërkombëtare, të cilën ai e përshkroi si “Bordi i Paqes”, e ideuar nga Presidenti i Shteteve të Bashkuara .
Sipas Ramës, ftesa është bërë personalisht nga Presidenti Trump dhe Shqipëria është përfshirë si anëtare themeluese e kësaj nisme. Kryeministri e bëri të ditur këtë zhvillim përmes një reagimi publik, duke e lidhur atë me marrëdhëniet mes Shqipërisë dhe Shteteve të Bashkuara.
Rama deklaroi se pjesëmarrja në këtë strukturë përfaqëson një vlerësim për rolin e Shqipërisë në arenën ndërkombëtare dhe për nivelin e bashkëpunimit strategjik me SHBA-në. Ai shtoi se bordi do të krijohet dhe drejtohet nga Presidenti Trump.
Deri në momentin e publikimit të këtij lajmi, nuk ka pasur një njoftim zyrtar nga Shtëpia e Bardhë apo institucione të tjera amerikane që të konfirmojë ekzistencën, përbërjen, funksionin apo statusin institucional të kësaj strukture të quajtur “Bordi i Paqes”.
Po ashtu, nuk janë bërë publike informacione mbi vendet e tjera që mund të jenë ftuar, kompetencat e këtij bordi, apo rolin konkret që do të ketë Shqipëria në të. Për momentin, informacioni mbetet i bazuar vetëm në deklarimin e kryeministrit shqiptar.