Kryetari i Partisë Demokratike, Sali Berisha , duke folur para mijëra qytetarëve në protestën kombëtare të zhvilluar në Bulevardin “Dëshmorët e Kombit”, deklaroi se opozita ndodhet në “kilometrin e fundit” të betejës së saj politike dhe se asgjë nuk do ta ndalë drejt fitores.
Në fjalën e tij, Berisha u shpreh se mesazhi i protestës së sotme është tentuar të fshihet nga mediat e lidhura me pushtetin, por sipas tij, ai ka kumbuar në çdo shtëpi të shqiptarëve. “Sot ne jemi në kilometrin e fundit; me ndihmën e Zotit, asgjë nuk do na ndalë drejt fitores sonë”, theksoi ai, duke shtuar se opozita ndodhet përpara një “triumfi të madh”, edhe pse shumëkush mund ta perceptojë ende si të largët për shkak të gjendjes së vendit.
Berisha e përshkroi rrugëtimin e opozitës si një maratonë të vështirë, të shoqëruar nga presione, izolime dhe përballje të ashpra me atë që e cilësoi “regjim narkodiktatorial”. Ai theksoi se, pavarësisht përdorimit të burgjeve, manipulimeve dhe lobimeve të korruptuara, opozita ka arritur të qëndrojë dhe të forcohet.
“Së bashku u përballëm me dhunën e narkoshtetit, por qëndruam stoikë, bëmë sakrifica të dhimbshme dhe u ngritëm si Feniksi nga hiri,” deklaroi Berisha, duke shtuar se projekti i “Shqipërisë pa opozitë” ishte i destinuar të dështonte dhe se kjo u dëshmua para shqiptarëve dhe botës.
Sipas tij, opozita ka arritur në këtë fazë pasi ka “plagosur për vdekje” regjimin aktual dhe është shndërruar në shpresën e vetme për qytetarët. Ai e mbylli fjalimin me një apel për besim dhe mobilizim, duke e cilësuar momentin aktual si vendimtar për ndryshimin politik në vend.
Protesta u shoqërua me pjesëmarrje masive dhe pankarta kundër qeverisë, ndërsa atmosfera në bulevard u karakterizua nga thirrje për ndryshim dhe llogaridhënie.