Blendi Klosi, Sekretari i Përgjithshëm i Partisë Socialiste, ka sqaruar publikisht një dilemë që prej ditësh shqetëson juristë, qytetarë dhe vetë Kushtetutën: një ministër nuk mund të pezullohet. Jo sepse nuk ka ligj, jo sepse nuk ka procedurë, por sepse është ministër dhe ka dalë nga vota e popullit.
Sipas Klosit, drejtësia mbështetet fuqishëm, përqafohet politikisht dhe respektohet publikisht, por vetëm deri në momentin që prek një funksion “të padelegueshëm”. Dhe ky funksion, çuditërisht, nuk është shteti, ligji apo interesit publik, por kolltuku ministror.
Në deklaratën e tij, Klosi sqaron se problemi nuk është drejtësia, por procedura. Një procedurë që, sipas tij, nuk mund të lejojë që një organ “i pazgjedhur nga populli” të pezullojë një ministër. Me këtë logjikë të re, rezulton se drejtësia është e mirë, por vetëm nëse merr vendime për të tjerët. Sapo afrohet te qeveria, kthehet në problem institucional.
Argumenti është i thjeshtë dhe elegant: ministri është zgjedhur indirekt nga populli, ndërsa gjykatësit dhe prokurorët jo. Prandaj, ata nuk kanë të drejtë të ndërhyjnë. Në këtë këndvështrim, vota nuk shërben për të dhënë mandat qeverisës, por për të krijuar imunitet moral dhe juridik.
Klosi shpjegon gjithashtu se nuk ka vendim të qartë të Gjykatës Kushtetuese, por megjithatë Partia Socialiste e ka të qartë vendimin e saj. Një risi demokratike, ku mungesa e vendimit gjyqësor zëvendësohet me siguri politike.
Në thelb, mesazhi është i qartë: drejtësia le të hetojë, le të flasë, le të ekzistojë, por pa u futur në territorin e ndaluar të pushtetit ekzekutiv. Sepse aty fillon zona e mbrojtur, ku ligji ndalon dhe politika vendos.
Kështu, koncepti i “funksionit të padelegueshëm” merr një kuptim të ri: jo si përgjegjësi që nuk mund t’i kalosh dikujt tjetër, por si mburojë që nuk mund ta prekë askush. Dhe në këtë version të ri të shtetit të së drejtës, ministri nuk pezullohet, jo sepse është i pafajshëm, por sepse është ministër.
Në fund, Partia Socialiste siguron se mbështet drejtësinë. Thjesht jo aq shumë sa të lejojë që ajo të funksionojë.