Asambleja e Përgjithshme Zgjedhore e Federatës Shqiptare të Futbollit rikonfirmoi Armand Dukën si President për një mandat të ri katërvjeçar, duke e çuar në shtatë numrin e mandateve në krye të institucionit më të lartë të futbollit shqiptar.
I vetëm në garë, Duka mori votë unanime nga anëtarët me të drejtë vote, në një proces të zhvilluar në ambientet e “Shtëpisë së Futbollit”. Zgjedhja e tij konfirmon vazhdimësinë në drejtimin e FSHF-së, në një periudhë ku futbolli shqiptar synon konsolidim institucional dhe objektiva të reja sportive.
Në fjalën e tij pas votimit, Duka falënderoi anëtarët për mbështetjen, duke e cilësuar votën si një vlerësim që e detyron për më shumë përkushtim në drejtimin e federatës.
Ai theksoi se prioritetet e mandatit të ri do të jenë zhvillimi i kampionatit, përmirësimi i infrastrukturës sportive, stabiliteti financiar dhe forcimi i futbollit kombëtar në të gjitha nivelet.
Presidenti i FSHF-së shprehu gjithashtu ambicien që Shqipëria të jetë pjesë e Botërorit 2026, duke i uruar suksese trajnerit Sylvinho dhe Kombëtares shqiptare në objektivat e ardhshëm.
Mandati i ri i Dukës vjen në një moment kur futbolli shqiptar po përpiqet të rrisë konkurrueshmërinë ndërkombëtare dhe të forcojë strukturat organizative, me synimin për të konsoliduar arritjet e viteve të fundit dhe për të synuar kualifikime historike në kompeticionet madhore.