Protesta e së premtes në qendër të Tiranës është shoqëruar me tensione të forta dhe përdorim masiv të gazit lotsjellës nga Policia e Shtetit, duke e kthyer zonën përreth Kryeministrisë dhe Kalasë së Tiranës në një hapësirë të mbuluar nga tymi dhe përplasjet.
Sipas raportimeve nga terreni, sasia e gazit të hedhur ka qenë e pazakontë, duke prekur jo vetëm protestuesit, por edhe qytetarë të rastësishëm dhe gazetarë që po mbulonin zhvillimet. Pamjet e shpërndara tregojnë qytetarë të shtrirë në rrugë dhe të tjerë që largohen me vështirësi nga zona e bllokuar.
Një protestues është lënduar rëndë në hyrje të Kalasë së Tiranës, ku sipas dëshmitarëve ai ka humbur ndjenjat pas ekspozimit ndaj gazit lotsjellës. Deputetë të Partisë Demokratike dhe qytetarë të pranishëm kanë tentuar t’i japin ndihmën e parë, ndërsa është raportuar mungesë e menjëhershme e ambulancës në shesh. I riu është transportuar me një mjet privat drejt spitalit.
Në të njëjtën kohë, qendra e Tiranës është bllokuar nga forca të shumta policore dhe automjete uji. Situata ka vijuar të jetë e tensionuar edhe në zonën e Rrugës së Elbasanit, ku janë raportuar hedhje molotovësh dhe kundërpërgjigje me gaz lotsjellës.
Policia ka nisur shoqërimet e protestuesve. Dy persona janë ndaluar pasi, sipas autoriteteve, mbanin molotovë me vete. Më herët janë shoqëruar edhe dy të mitur në lidhje me incidentet gjatë tubimit.
Zhvillimet e mbrëmjes së 20 shkurtit kanë thelluar përplasjen mes opozitës dhe institucioneve të rendit, ndërsa pritet reagim zyrtar i plotë nga Policia e Shtetit mbi arsyet e përdorimit të gazit dhe numrin e personave të ndaluar.
Qendra e Tiranës mbetet nën masa të forta sigurie, ndërsa situata në terren vijon të monitorohet nga forcat e rendit.