Gjykata e Lartë ka rrëzuar rekursin e paraqitur nga Ilir Meta, duke lënë në fuqi masën e sigurisë ndaj tij. Si pasojë e këtij vendimi, ish-presidenti i Republikës do të vijojë të qëndrojë në paraburgim.
Meta kishte kërkuar heqjen e masës së sigurisë, duke argumentuar se nuk ekzistojnë kushtet dhe kriteret ligjore për ta mbajtur në qelitë e paraburgimit. Megjithatë, pretendimet e tij nuk u morën në konsideratë nga gjykata supreme.
Ndërkohë, Gjykata e Posaçme ka përmbyllur seancën paraprake në procesin penal ndaj Ilir Metës, ish-bashkëshortes së tij Monika Kryemadhi dhe tre të pandehurve të tjerë.
Vendimi përfundimtar mbi këtë fazë pritet të merret të mërkurën e ardhshme, kur gjykata do të vendosë nëse dosja penale ndaj tyre do të kalojë ose jo për gjykim.
Ndaj Ilir Metës rëndojnë akuza të rënda, përfshirë korrupsionin, pastrimin e parave dhe fshehjen e pasurisë, çështje për të cilat hetimet janë zhvilluar nga Struktura e Posaçme Kundër Korrupsionit dhe Krimit të Organizuar (SPAK).