Presidenti i Shteteve të Bashkuara, Donald Trump, deklaroi se për SHBA rritja e çmimeve të naftës mund të sjellë përfitime ekonomike, duke theksuar se vendi është prodhuesi më i madh i naftës në botë.
Në një postim në platformën Truth Social, Trump shkroi se rritja e çmimeve të naftës nuk është shqetësimi kryesor për të, pasi prioriteti i tij mbetet parandalimi i Iranit nga zhvillimi i armëve bërthamore.
“Shtetet e Bashkuara janë padyshim prodhuesi më i madh i naftës në botë, kështu që kur çmimet e naftës rriten, ne fitojmë shumë para”, deklaroi ai.
Megjithatë, presidenti amerikan theksoi se çështja më e rëndësishme për të është siguria globale dhe ndalimi i Iranit nga sigurimi i armëve bërthamore.
“Por ajo që është shumë më e rëndësishme për mua si President është të ndalojmë perandorinë e ligë, Iranin, që të sigurojë armë bërthamore dhe të shkatërrojë Lindjen e Mesme dhe ndoshta edhe botën”, shtoi Trump në mesazhin e tij.
Deklarata e tij vjen në një moment kur lufta në Lindjen e Mesme ka shtyrë çmimet e naftës mbi 100 dollarë për fuçi, për shkak të tensioneve dhe ndërprerjeve në furnizimin global me energji.
Rritja e çmimeve është lidhur edhe me krizën në Ngushticën e Hormuzit, një nga rrugët më të rëndësishme të transportit të naftës në botë, përmes së cilës kalon rreth një e pesta e furnizimit global me naftë.
Pavarësisht debatit për ndikimin e kësaj situate në ekonominë globale, Trump theksoi se për administratën e tij prioritet mbetet ndalimi i ambicieve bërthamore të Iranit dhe garantimi i stabilitetit në rajon.