Rreth 152 mijë pasagjerë kanë udhëtuar gjatë muajit korrik për/ nga TIA, nga të cilët 26,881 janë pasagjerë të fluturimeve Charter, referuar të dhënave zyrtare të ardhura në Autoritetin e Aviacionit Civil nga Aeroporti Ndërkombëtar “Nënë Tereza”, Departamenti i Marketingut të Linjave Ajrore. Të dhënat u bënë të ditur në buletinin e muajit gusht të Autoritetit të Aviacionit Civil.
Bazuar në të dhënat e mësipërme, në muajin korrik 2020 kompania “Wizz Air” zotëron tregun me 33% te totalit dhe një numër prej 149,488 pasagjerë, pasuar nga fluturimet charter, të cilat zotërojnë 18% të tregut dhe duke vijuar me kompaninë italiane Blue Panorama e cila zotëron me 13% tregun. Dy kompanitë shqiptare Albawings dhe Air Albania zotërojnë tregun me 10 % dhe 9%.
Sipas buletinit, Ky vazhdon të jetë muaji i vështirë për Aviacionin Civil në të gjithë botën, si pasojë e pandemisë COVID-19 dhe numrat e udhëtarëve janë të ulëta.
Të dhënat e tjera të INSTAT tregojnë se në korrik të një viti më parë, udhëtimet me avion kulmuan në korrik, me 385 mijë pasagjerë, që u nisën nga Rinasi, ose kishin destinacion mbërritës aeroportin e vetëm shqiptar. Në korrik të këtij viti, numri i pasagjerëve në Rinas ra me 60% në krahasim me të njëjtën periudhë të një viti më parë, duke shënuar më shumë sesa përgjysmim.
Wizz Air ka qenë kompania më aktive në kohë pandemie, duke arritur të marrë pjesën më të madhe të tregut në korrik, pasi zgjeroi destinacionet në 25 të tilla si dhe hapi bazën e saj ajrore në Aeroportin Nënë Tereza. Një strategji të tillë zgjerimi Wizz po e ndjek dhe në tregjet e tjera europiane.
Më herë tregu zotërohet nga Blue Panorama dhe Alba Wings, që kryesonin në destinacionet italiane. Në korrik, të dy këto kompani kishin 22% të tregut.
Operatori shqiptar Air Albania u rendit i dyti deri për 6 mujorin e parë, kryesisht pasi ishte i vetmi që fluturoi në periudhën e pandemisë, për riatdhesimit, ndërsa në korrik ai zuri 10% të tregut, duke u renditur e katërta, pas Wizz Air, Blue Panorama dhe Alba Wings.
Charterat zunë 18% të fluturimeve në korrik, por ato ishin të kufizuara vetëm nga tre shtete, Bjellorusia, Ukraina dhe Polonia, ndryshe nga viti i kaluar kur fluturime direkte kishte nga shumë shtete të Europës, si vendet nordike, Çekia etj, ish shtetet e bashkimit Sovjetik, por edhe nga Izraeli.
