Sot ka mbërritur në Tiranë trupi i pajetë i Kryepeshkopit të Kishës Ortodokse të Shqipërisë, Anastas Janullatos. Kryepeshkopi u prit me nderime nga qindra besimtarë, të cilët mbanin në duar lule dhe gjethe dafine. Arkëmorti u shoqërua nga klerikët dhe u vendos në Katedralen “Ringjallja e Krishtit”, ku do të mbahen homazhe deri të enjten, më 30 janar, kur do të zhvillohet ceremonia mortore.
Masat e Policisë për mbarëvajtjen e homazheve
Policia e Tiranës ka hartuar një plan masash për të garantuar zhvillimin e homazheve. Në këtë kuadër, janë marrë masa për bllokimin e disa akseve rrugore nga ora 15:00 e datës 28 janar deri në orën 14:00 të datës 30 janar. Rrugët e bllokuara përfshijnë:
- Segmenti “Ibrahim Rugova”: Nga Banka e Shqipërisë deri te Gjykata e Lartë.
Devijimi i mjeteve do të bëhet në Rrugën e Barrikadave, bulevardin “Zogu i Parë”, Rrugën “Mine Peza” dhe Rrugën e Kavajës. - Rruga e Kavajës: Nga kryqëzimi me Rrugën e Bogdanëve deri te kryqëzimi me Rrugën “Ibrahim Rugova”.
- Rruga “Ded Gjo Luli”: Devijimi do të bëhet në drejtim të Rrugës së Selvisë.
Gjithashtu, dalja nga Rruga “Myslym Shyri” do të devijohet drejt bulevardit “Gjergj Fishta”.
Këto masa synojnë të sigurojnë zhvillimin e rregullt të homazheve dhe ceremonisë mortore, ndërsa qytetarët janë udhëzuar të shmangin këto akse për të evituar vonesa.