Sllovenia u bë vendi i parë europian që i dha fund pandemisë së koronavirusit në territorin e saj të enjten, edhe pse qeveria paralajmëroi se, për momentin, disa masa do të duhet të mbeten në fuqi në vend.
Qeveria sllovene njoftoi përfundimin e shpërthimit të koronavirusit në vend në një seancë telefonike të enjten, pasi kishte ndërmarrë masat emergjente më 12 mars, vendi i parë europian që e bëri këtë.
Situata aktuale “bën të mundur zbutjen e masave që ishin urgjente për të frenuar dhe menaxhuar përhapjen e COVID-19, por ato ende nuk mund të shfuqizohen plotësisht,” tha qeveria në një njoftim për shtyp.
Kryeministri Janez Jansa tha të enjten se Sllovenia ishte “vendi më i suksesshëm në BE në trajtimin e epidemisë”, se situata epidemiologjike tani ishte e favorshme dhe qeveria tani do të përqendrohet në çështjet ekonomike dhe rikuperimin pas krizës shëndetësore.
Instituti Kombëtar i Shëndetit Publik, NIJZ, raportoi se Sllovenia kishte regjistruar vetëm 35 raste me COVID-19 në 14 ditët e kaluara dhe shkalla e përhapjes, e cila tregon se sa njerëz infekton mesatarisht një person, kishte rënë nën 1.
Rasti i parë i konfirmuar me COVID-19 në Slloveni, një shtet anëtar i BE-së me një popullsi prej rreth 2 milionë banorësh, u regjistrua më 4 mars. Deri më 13 maj, u infektuan 1,464 raste dhe 103 vetë ndërruan jetë si pasojë e koronavirusit.
Autoritetet vendosën me shpejtësi një izolim të rreptë, duke mbyllur shumicën e dyqaneve dhe të gjitha shkollave dhe duke ndaluar lëvizjen në natyrë dhe tubimet në vendet publike. Në mes të prillit, Sllovenia filloi t’i lehtësonte këto masa.
Qeveria tha se testimi, gjurmimi i kontratave, izolimi dhe karantinimi i kontakteve me rrezik të lartë, respektimi i etikës sociale dhe distancimi fizik do të mbeten masat kryesore për të luftuar mbetjet e epidemisë.
Sllovenia ka vendosur të lejojë që shtetasit e BE-së të kalojnë kufirin në pikat e kontrollit të zgjedhura, duke i dhënë fund politikës së karantinimit shtatë ditor. Shtetasit e vendeve të treta do t’i nënshtrohen një karantinimi dyjavor, me disa përjashtime.
Përhapja e COVID-19 ka përkuar me rikthimin në pushtet të politikanit veteran të krahut të djathtë Janez Jansa, të cilin kritikët e akuzojnë se ka shfrytëzuar pandeminë për të kufizuar liritë.