Një burrë francez i akuzuar për ngacmimin e qindra fëmijëve në Indonezi ka vdekur në qeli dhe policia dyshon se bëhet fjalë për vetëvrasje.
Siç shkruan BBC, Francois Camille Abello, 65 vjeç, u gjet i pajetë të enjten e kaluar, në qelinë e tij në një qendër paraburgimi në kryeqytetin e Indonezisë, Xhakartë.
Pensionisti u arrestua muajin e kaluar në një hotel në Xhakartë. Policia thotë se ai kishte qenë në një dhomë me dy vajza të mitura.
Videot që u gjetën në kompjuterin e Abellos tregonin se ai ishte i përfshirë në akte seksuale të paligjshme me më shumë se 300 fëmijë të moshës midis 10 dhe 17 vjeç.
Sipas policisë, Abello besohej se kishte në shënjestër fëmijët e rrugës, të cilët i joshte duke u ofruar para për t’i fotografuar në dhomën e tij të hotelit, ku më pas abuzonte me ta.
Policia thotë se kush refuzonte, ai i rrihte.
Umar Shahab, një zyrtar në Spitalin Kombëtar të Policisë në Xhakartë, tha se Abello kishte pësuar një thyerje në qafë që kishte bllokuar furnizimin e tij me oksigjen. Zëdhënësi tregon që rojet në qendrën e paraburgimit ishin marrë në pyetje dhe qelia ishte ekzaminuar si pjesë e hetimit për vdekjen e Abellos.