Rritja e çmimeve të fruta-perimeve po godet drejtpërdrejt buxhetet familjare, ndërsa produktet bazë po bëhen gjithnjë e më të papërballueshme për qytetarët. Një vëzhgim i fundit në tregjet e kryeqytetit tregon një realitet alarmant, ku çmimet kanë pësuar rritje të ndjeshme brenda një periudhe shumë të shkurtër.
Domatet, një nga produktet më të konsumuar, po shiten nga 250 deri në 350 lekë për kilogram, ndërsa në disa raste arrijnë edhe më lart. Por ajo që bie më shumë në sy është çmimi i specave, që ka kapur nivele ekstreme, duke shkuar nga 350 deri në 500 lekë për kilogram, një nivel që deri pak kohë më parë konsiderohej i paimagjinueshëm.
Rritja nuk ndalet këtu. Edhe produkte të tjera si patëllxhanët, brokoli, lulelakra, barbunjat dhe bizelet kanë kaluar kufijtë normalë të çmimeve, duke u kthyer në luks për shumë familje shqiptare. Në tregje, qytetarët shprehen se nuk përballojnë më këto kosto, ndërsa aktiviteti tregtar duket i dobësuar dhe tezgat shpesh janë më pak të frekuentuara.
Një nga elementët më shqetësues është diferenca e madhe mes çmimeve të shumicës dhe atyre të pakicës. Nga fermeri deri te konsumatori final, çmimi rritet ndjeshëm, duke ngritur dyshime për zinxhirin e furnizimit dhe për mënyrën se si funksionon tregu. Kjo diferencë sugjeron se problematika nuk lidhet vetëm me prodhimin, por edhe me ndërmjetësit dhe strukturën e tregtimit.
Ndryshimet e çmimeve vihen re edhe sipas zonave. Në zonat qendrore dhe më të zhvilluara të qytetit, çmimet janë dukshëm më të larta krahasuar me periferinë. Edhe në marketet e lagjeve, rritja është reflektuar, ndërsa tregtarët, jashtë kamerave, pranojnë se kostot e tyre janë shtuar ndjeshëm.
Situata aktuale po krijon një presion të fortë mbi konsumatorët dhe po nxjerr në pah një treg të paqëndrueshëm, ku çmimet lëvizin pa kontroll të dukshëm. Në mungesë të mekanizmave efektivë të monitorimit dhe ndërhyrjes, rritja e çmimeve rrezikon të kthehet në një krizë të përditshme për familjet shqiptare, që po përballen me një realitet ku edhe produktet më bazike po bëhen gjithnjë e më të paarritshme.