Legjenda e boksit, Mike Tyson, ka dëshmuar se nuk e ka humbur shpejtësinë dhe fuqinë e ikonës së peshave të rënda, ndërkohë që po përgatitet për t’iu kthyer boksit.
53-vjeçari ka paralajmëruar se do të kthehet në ring, 15 vite pas pensionimit, për të konkurruar në ndeshje miqësore që do të kenë qëllime bamirëse.
Për ta dëshmuar se akoma e ka boksin në vetvete, Tyson e ka publikuar një video nga stërvitjet në Instagram, duke treguar shenjat e tij dalluese: shpejtësinë dhe fuqinë.
Boksieri amerikan e shkroi emrin në histori si një prej yjeve më të frikshme të këtij sporti, kur e mposhti Trevor Berbickun në vitin 1986 dhe u bë kampioni më i ri (20 vjeç) në kategorinë e peshave të rënda.
Mirëpo, problemet në jetën e tij personale ndikuan në karrierën e Tyson, e cila pati ngritjen dhe rëniet e veta. Pas qëndrimit trevjeçar në burg, në vitin 1996 i riktheu titujt WBC dhe WBA, por të njëjtin vit humbi nga Evander Holyfield dhe një vit më pas ia kafshoi veshin.
Statistikat e tij janë 50–6, me 44 fitore të realizuara me nokaut, ndërsa ‘Iron Mike’ konsiderohet si boksieri më i famshëm në kategorinë e peshave të rënda.