Nafta po shfaqet e qëndrueshme edhe në sesionin e sotëm, ndërsa vijon të gjendet nën presion si pasojë e rritjes së rezervave në SHBA dhe shtyrjes së vendimit të OPEC+ për kuotat e prodhimit.
Nafta Brent e Londrës po tregtohet në rreth 47 dollarë për fuçi, ndërsa nafta Bruto amerikane po tregtohet në rreth 44 dollarë për fuçi.
Të dhënat e publikuara nga Instituti Amerikan i Naftës treguan se rezervat e naftës bruto u rritën me 4.1 milionë fuçi, gjatë javës së kaluar, ndërsa analistët parashikonin një rënie me 2.4 milionë fuçi.
Të dhënat vijnë ndërkohë që OPEC dhe aleatët e tjerë vendosën të shtyjnë bisedimet për politikat e prodhimit deri të enjten, ndërsa duhej të përfundonin të martën.
Kjo tregon se vendet më të mëdha prodhuese në botë po hasin vështirësi në arritjen e një marrëveshje. Aktualisht, OPEC+ po zbaton marrëveshjen për uljen e prodhimit me 7.7 milionë fuçi në ditë, pasi pandemia e koronavirusit ka dëmtuar kërkesën.
Sipas marrëveshjes së muajit prill, grupi duhet të rrisë prodhimin me 2 milionë fuçi duke filluar nga janari, por rritja e infektimeve mund ta shtyjë këtë vendim deri më mars.
Megjithatë, humbjet po kufizohen nga shpresat se shumë shpejt do të fillojë vaksinimi kundër Covid-19 në shumë vende të botës, që përkthehet në rimëkëmbjen e ekonomisë dhe të kërkesës për naftë.
Bursa për datën 1 Dhjetor 2020 u mbyll si më poshtë:
| Produkti | Çmimi ditor ( $/mt ) | Ndryshimi ditor +/- ( $/mt ) |
| BENZINA | 409.00 | + 9.50 |
| DIESEL | 389.50 | + 5.50 |
©aktualitet.al