Ashtu siç erdhi dhe drejtoi ministrinë për Evropën dhe Punët e Jashtme, po njësoj në mënyrën më butaforike edhe iku.
Bëhet fjalë për Gent Cakajn, i cili edhe në ikje nëpërmjet një shënimi në FB, jo vetëm që ka pompuar veten si super-ministër, por edhe nuk ka pranuar faktin se është larguar nga Edi Rama, i cili prej kohësh as që e priste më nëpër takime dhe në zyrën e tij.
Situata bëhet edhe më qesharake, pasi vetë Cakaj njofton se ka paraqitur dorëheqje të parevokueshme dhe me efekt të menjëhershëm (këtë të fundit e ka në dorë kryeministri, siç veproi me ministrin Sandër Lleshaj që e mbajti 3 ditë ‘në ajër’), kurse Rama shkruan në të njëjtën kohë, se stafetën e tij ja ka kaluar Olta Xhaçkës!
“Dëshiroj të ju njoftoj që sot, e martë, 29 dhjetor 2020, i kam paraqitur Kryeministrit të Republikës së Shqipërisë, z. Edi Rama, dorëheqjen e parevokueshme dhe me efekt të menjëhershëm si Ministër në detyrë për Evropën dhe Punët e Jashtme të Republikës së Shqipërisë”, shkruan Cakaj në FB.
Por Edi Rama nuk ka denjuar që t`ia rezervojë as një ikje me “dinjitet”.
“Pas një periudhe intensive pune në kryesimin e OSBE si edhe punës së madhe me përkushtim e profesionalizëm të Gent Cakajt si ministër në detyrë, ky është momenti për t’ia kaluar bashkarisht stafetën Olta Xhaçkës që të kryejë detyrën e ministres për Europën dhe Punët e Jashtme”, shkruan në Twitter kryeministri pa e përmendur fare dorëheqjen e ish-të përkëdhelurit të tij, Gent Cakajt.
