Bashkimi Evropian ka vendosur tarifa deri në 45.3% mbi automjetet elektrike të prodhuara në Kinë, si një masë për të luftuar subvencionet e padrejta dhe për të mbrojtur industrinë e vet. Ky vendim vjen si rezultat i hetimeve të gjera mbi praktikat e subvencionimit kinez dhe ka nxitur reagime të ashpra nga Pekini, që tashmë ka nisur hetime mbi importet nga BE-ja të produkteve si konjaku dhe bulmeti.
Sipas Komisionit Evropian, makinat elektrike kineze zënë aktualisht rreth 8% të tregut evropian dhe ky përqindje pritet të rritet në 15% deri në vitin 2025. Me çmime zakonisht 20% më të ulëta se makinat evropiane, këto automjete janë bërë zgjedhje e preferuar për konsumatorët evropianë, duke rritur presionin ndaj prodhuesve vendas.
Në këtë kontekst, BE-ja ka ndërmarrë veprime për të kufizuar praninë e makinave kineze, duke shtuar tarifat mbi ato të importuara, të cilat tashmë përballen me një tarifë standarde prej 10%. Tarifat e reja janë publikuar në Gazetën Zyrtare të BE-së dhe do të hyjnë në fuqi të mërkurën.
Ky zhvillim i ri ka thelluar përçarjen brenda bllokut evropian, pasi disa vende si Gjermania janë kundër tarifave shtesë. Në një votim të fundit, 10 vende anëtare e mbështetën masën, ndërsa pesë ishin kundër dhe 12 abstenuan.
Ndërsa tensionet tregtare me Kinën rriten, qëndrimi i BE-së reflekton nevojën për të mbrojtur ekonominë e saj nga sfidat e reja që vijnë nga tregjet në rritje si ai kinez.