Kompania Kosovare e Distribuimit të Energjisë ka bërë të ditur se importi i energjisë elektrike ka arritur në 1.5 milionë euro në ditë, ndërkohë që Kosova vazhdon të përballet me krizën energjetike para fillimit të dimrit. Për shkak të uljes së temperaturave dhe rritjes së konsumit, KEDS ka apeluar për kursimin e energjisë elektrike për të lehtësuar situatën.
Kërkesa për energji ka arritur në mbi 1100 megavat orë, duke prekur kulmin, ndërsa konsumatorët këshillohen të mbajnë parasysh se tarifat e energjisë në Kosovë ndryshojnë pas konsumit të 800 kWh, duke aplikuar tarifa më të larta për çdo kilovat orë mbi këtë prag. Kjo është bërë për të nxitur kursimin dhe për të reduktuar presionin mbi furnizimin energjetik.
KESCO, furnizuesi kryesor i energjisë në Kosovë, ka njoftuar një rritje të kërkesës për energji me 18% në krahasim me të njëjtën periudhë të vitit të kaluar. Konsumatorët janë këshilluar që të shmangin ngrohjen me energji elektrike dhe të përdorin metoda më efikase të ngrohjes aty ku është e mundur, duke kontribuar kështu në stabilizimin e situatës.
Ky apel vjen ndërkohë që konsumatorët kosovarë po përballen me rritje të kostove të energjisë, dhe rritja e konsumit vetëm se e vështirëson më tej situatën.