Në orët e para të mëngjesit të 19 nëntorit 2024, Klaudio Prendi, 28 vjeç, u ekzekutua në zonën e Xhamllikut në Tiranë. Viktima, djali i ish-gjyqtarit të Gjykatës së Krimeve të Rënda, Fran Prendi, u qëllua rreth orës 01:40 teksa po dilte nga një lokal dhe po futej në automjetin e tij të tipit G-Class.
Autorët, ende të paidentifikuar, përdorën një armë me silenciator për të kryer krimin, duke lëshuar pesë plumba që e goditën Prendin në kokë dhe bark. Viktima u dërgua menjëherë në Spitalin e Traumës, por nuk arriti t’u mbijetojë plagëve të marra.
Rreth një orë pas ngjarjes, policia gjeti një automjet të djegur me targa të huaja në zonën e Farkës, që dyshohet të ketë lidhje me autorët. Hetimet paraprake tregojnë se Klaudio Prendi ishte mbajtur nën vëzhgim nga autorët përpara atentatit.
Prendi ishte përfshirë më parë në një incident me armë në Pukë, në maj të vitit 2023, ku dyshohet se kishte qëlluar në ajër nga një automjet në lëvizje, një episod që mund të ketë rëndësi për hetimet.
Policia ka nisur hetimet dhe ka shoqëruar disa persona për të zbardhur motivet dhe rrethanat e krimit. Autorët e ngjarjes janë ende në kërkim, ndërsa hetimet po vazhdojnë.