Kryeministri i Kosovës, Albin Kurti, deklaroi në një intervistë për një gazetë zvicerane se elita politike në Beograd nuk ka hequr dorë nga ideja e Serbisë së Madhe. Sipas Kurtit, kjo ide tani shitet me emrin “Bota Serbe,” e cila synon bashkimin e të gjithë serbëve në një shtet, çka do të kërkonte shpërbërjen e Bosnje-Hercegovinës, Malit të Zi dhe Kosovës.
Kurti theksoi se Serbia ndjek një strategji hakmarrjeje të ngjashme me atë të Azerbajxhanit në Nagorno-Karabak. Sipas tij, Vuçiç po përpiqet të ndjekë një model strategjik duke forcuar ekonominë dhe duke riarmatosur ushtrinë për të vepruar kur kushtet gjeopolitike të jenë të favorshme.
“Vuçiç ushtron durim strategjik, por qëllimi mbetet hakmarrja. Ne duhet të jemi të përgatitur për këtë,” tha Kurti. Ai akuzoi Vuçiçin për manipulim të opinionit ndërkombëtar dhe theksoi nevojën që Kosova të jetë vigjilente ndaj këtyre rreziqeve.
Deklaratat e Kurtit pritet të ndezin debate në arenën ndërkombëtare dhe të vënë në pikëpyetje qasjen aktuale të Perëndimit ndaj dialogut Kosovë-Serbi.