Pensionistët janë mbledhur për herë të gjashtë përpara Kryeministrisë për të kërkuar përmirësime në kushtet e tyre të jetesës dhe trajtim më dinjitoz nga qeveria. Kryesore ndër kërkesat e tyre janë rritja e pensioneve për të përballuar minimumin jetik, njohja e statusit të minatorit dhe përmirësimi i skemave të mbështetjes sociale.
Ata theksojnë se bonusi i fundvitit është një “mashtrim” dhe jo një zgjidhje afatgjatë, ndërsa kërkojnë reforma që garantojnë të ardhura dinjitoze dhe të qëndrueshme. Pensionistët nënvizuan vështirësinë për të përballuar çmimet në rritje, veçanërisht ato të shportës, dhe kritikuan qeverinë për mungesën e dialogut me grupet e organizuara të pensionistëve.
Me një mesatare prej 15,000-19,000 lekësh në muaj, pensionet aktuale janë dukshëm nën minimumin jetik të llogaritur në 20,000 lekë. Sipas një ankete të Citizens.al, 87.5% e pensionistëve nuk arrijnë të përballojnë shpenzimet mujore pa ndihmën e fëmijëve, ndërsa pjesa më e madhe e të ardhurave të tyre shpenzohen për ilaçe.
Ndërkohë, qeveria ka premtuar reforma për skemën e kontributeve shoqërore, por nuk ka ndërmarrë hapa konkretë për të adresuar kërkesat e tyre. Pensionistët, të mbështetur nga Lëvizja Bashkë, shprehen të vendosur të vazhdojnë protestat deri në plotësimin e kërkesave të tyre.