Një tjetër skandal përfshin rrugët me pagesë në Shqipëri. Duke nisur nga 4 janari, përdoruesit e aksit Thumanë-Kashar do të përballen me një tarifë prej 270 lekësh (2.1 euro) për 21 kilometra rrugë. Megjithatë, ky çmim ka ngritur shqetësime për një manipulim të kursit të këmbimit valutor nga kompania koncensionare ‘Gener2’, e lidhur me biznesmenin Bashkim Ulaj, një figurë shpesh e favorizuar nga qeveria.
Kursi i këmbimit, jashtë realitetit
Sipas analizave, 2.1 euro korrespondojnë me 210-215 lekë, bazuar në kursin aktual të këmbimit. Megjithatë, kompania ka vendosur një tarifë prej 270 lekësh, duke përdorur një kurs të vjetër prej 130 lekësh për euro, i cili nuk është më i vlefshëm prej dy vitesh. Kjo diferencë nënkupton një fitim të padrejtë prej 600 lekësh për çdo automjet që kalon në këtë aks.
Përfitimet e kompanisë dhe qeveria që mbyll sytë
Kompania ‘Gener2’, që ka një histori të gjatë koncensionesh të dyshimta, vazhdon të favorizohet nga qeveria, duke i mundësuar fitime të mëdha në kurriz të qytetarëve. Kjo tarifë e fryrë ngre pikëpyetje mbi rolin e qeverisë në mbrojtjen e interesave të publikut. Ajo nuk ka ndërhyrë për të korrigjuar këtë praktikë abuzive, duke u bërë bashkëfajtore në këtë skemë të grabitjes.
Zgjidhja për qytetarët: Paguani në euro!
Në mungesë të një ndërhyrjeje nga autoritetet, qytetarët mund të shmangin këtë abuzim duke paguar drejtpërdrejt në euro në vendkalimet e pagesës. Kjo do t’i shpëtonte ata nga diferencat e larta të kursit të aplikuara nga kompania.
Koncesione që rëndojnë popullin
Rruga Thumanë-Kashar është vetëm një shembull i radhës i koncesioneve që favorizojnë bizneset e mëdha dhe godasin qytetarët e zakonshëm. Historia e lidhjeve të Bashkim Ulajt me qeverinë ka ngritur prej kohësh shqetësime për favorizime dhe abuzime. Kjo situatë është një tjetër ilustrim i mënyrës se si qytetarët shqiptarë paguajnë për politika që pasurojnë një grusht biznesmenësh dhe mbajnë peng zhvillimin e vendit.
Drejtësia mungon
Në mungesë të transparencës dhe ndërhyrjes nga institucionet përkatëse, qytetarët do të vazhdojnë të jenë viktima të një sistemi që favorizon pakicën në dëm të shumicës. Një zgjidhje e qëndrueshme kërkon reforma reale dhe një sistem që mbron interesat e qytetarëve, jo të oligarkëve.