Një aksident dramatik ka ndodhur këtë mbrëmje në rrugën e “Kishës së Laçit,” ku një automjet ka dalë nga rruga dhe ka përfunduar në një humnerë prej 70 metrash. Brenda mjetit ndodhej një çift, të cilët kanë pësuar dëmtime të rënda, por janë shpëtuar nga banorët e zonës.
Sipas burimeve paraprake, automjeti dyshohet të ketë humbur kontrollin për shkak të një manovre të gabuar ose problemeve teknike. Pas përplasjes, banorët e një shtëpie pranë vendit të ngjarjes ndërhynë për të shpëtuar çiftin nga mjeti i dëmtuar rëndë. Çifti u transportua menjëherë në spital me ambulancë.
Grupi hetimor ndodhet në vendngjarje për të sqaruar shkaqet dhe rrethanat e aksidentit. Ky incident ngre edhe njëherë shqetësimin për sigurinë rrugore dhe nevojën për kujdes maksimal në rrugë të rrezikshme.